leTa hua hun saya-e-ghurbat mein ghar se dur

leTā huā huuñ sāya-e-ġhurbat meñ ghar se duur

dil se qarīñ haiñ ahl-e-vatan aur nazar se duur

jab tak hai dil rahīn-e-ma.āl-o-asīr-e-aql

rahnā hai tujh se aur tirī rahguzar se duur

ai kaif un kī mast nigāhoñ meñ chhup ke aa

ai dard-e-dam zadan meñ ho mere jigar se duur

ik din ulaTne vaalī hai zāhid bisāt-e-zohd

kab tak rahegā dil nigah-e-fitna-gar se duur

vo koī zindagī hai javānī hai vo koī

ai dost jo hai tere jamāl-e-nazar se duur

kyā aa.ī tere jī meñ ki taqdīr yuuñ mujhe

pheñkā hai lā ke vādī-e-ġhurbat meñ ghar se duur

ai husn-e-be-panāh batā.e koī mujhe

duniyā kī kaun chiiz hai tere asar se duur

allāh re nasīb ki paa.ī hai vo fuġhāñ

jo umr bhar rahī hai fareb-e-asar se duur

'altāf' naaz apnī gadā.ī pe hai mujhe

dāman hai us kā sāya-e-la.al-o-gohar se duur

leTa hua hun saya-e-ghurbat mein ghar se dur

dil se qarin hain ahl-e-watan aur nazar se dur

jab tak hai dil rahin-e-maal-o-asir-e-aql

rahna hai tujh se aur teri rahguzar se dur

ai kaif un ki mast nigahon mein chhup ke aa

ai dard-e-dam zadan mein ho mere jigar se dur

ek din ulaTne wali hai zahid bisat-e-zohd

kab tak rahega dil nigah-e-fitna-gar se dur

wo koi zindagi hai jawani hai wo koi

ai dost jo hai tere jamal-e-nazar se dur

kya aai tere ji mein ki taqdir yun mujhe

phenka hai la ke wadi-e-ghurbat mein ghar se dur

ai husn-e-be-panah batae koi mujhe

duniya ki kaun chiz hai tere asar se dur

allah re nasib ki pai hai wo fughan

jo umr bhar rahi hai fareb-e-asar se dur

'altaf' naz apni gadai pe hai mujhe

daman hai us ka saya-e-lal-o-gohar se dur