libas-e-zist kabhi yun bhi tera darshan ho

libās-e-zīst kabhī yuuñ bhī terā darshan ho

sajī sajā.ī huī jaise koī dulhan ho

ye qaht-e-sher paḌā ho na qaht-e-ġham ke sabab

charāġh itnā hī jaltā hai jitnā īñdhan ho

ye maiñ hī huuñ jo udāsī nikāltā huuñ tirī

har ik fasīl meñ lāzim nahīñ ki rauzan ho

tū apne ḳhvāb mirī aañkh se na dekhā kar

baratne ke liye behtar hai apnā bartan ho

ajiib jaldī thī bachpan meñ kab baḌe hoñge

baḌe hue haiñ to jī chāhtā hai bachpan ho

kaḌī jo TuuTī to sābit nahīñ rahī zanjīr

aham hai vo bhale chhoTā sā koī bandhan ho

libas-e-zist kabhi yun bhi tera darshan ho

saji sajai hui jaise koi dulhan ho

ye qaht-e-sher paDa ho na qaht-e-gham ke sabab

charagh itna hi jalta hai jitna indhan ho

ye main hi hun jo udasi nikalta hun teri

har ek fasil mein lazim nahin ki rauzan ho

tu apne KHwab meri aankh se na dekha kar

baratne ke liye behtar hai apna bartan ho

ajib jaldi thi bachpan mein kab baDe honge

baDe hue hain to ji chahta hai bachpan ho

kaDi jo TuTi to sabit nahin rahi zanjir

aham hai wo bhale chhoTa sa koi bandhan ho