lijiye ab raaz-e-dil ifsha hua

lījiye ab rāz-e-dil ifshā huā

har taraf bāteñ huiiñ charchā huā

mujh pe bhī taarī thī jaise be-ḳhudī

vo bhī thā jaise kahīñ khoyā huā

tere bin jiinā kise manzūr thā

zindagī se ek samjhauta huā

ḳhāna-e-dil meñ charāġh-e-ārzū

hai kabhī jaltā kabhī bujhtā huā

us kī rangat par khule har ik libās

ruup us kā hai ajab nikhrā huā

ik javānī kaif meñ Duubī huī

ik badan mahkā huā tarshā huā

ab talak taaza hai yādoñ kī mahak

aap se bichhḌe hue arsa huā

dil jigar aql-o-ḳhirad hosh-o-havās

ek lashkar thā ki jo paspā huā

dil ke ka.abe meñ mire ab bhī 'zamīr'

ek but muddat se hai rakkhā huā

lijiye ab raaz-e-dil ifsha hua

har taraf baaten huin charcha hua

mujh pe bhi tari thi jaise be-KHudi

wo bhi tha jaise kahin khoya hua

tere bin jina kise manzur tha

zindagi se ek samjhauta hua

KHana-e-dil mein charagh-e-arzu

hai kabhi jalta kabhi bujhta hua

us ki rangat par khule har ek libas

rup us ka hai ajab nikhra hua

ek jawani kaif mein Dubi hui

ek badan mahka hua tarsha hua

ab talak taza hai yaadon ki mahak

aap se bichhDe hue arsa hua

dil jigar aql-o-KHirad hosh-o-hawas

ek lashkar tha ki jo paspa hua

dil ke kabe mein mere ab bhi 'zamir'

ek but muddat se hai rakkha hua