likhne laga wo dard ka qissa zamin par

likhne lagā vo dard kā qissa zamīn par

jo ashk merī aañkh se Tapkā zamīn par

ik maañ talāsh-e-rizq meñ ghar se nikal paḌī

rakh kar niDhāl bhuuk se bachcha zamīn par

tum ko kisī jagah na mukammal milūñgā maiñ

aadhā huuñ āsmān pe aadhā zamīn par

'azvar' milī na un ko lahad ke liye jagah

karte the zindagī meñ jo qabza zamīn par

likhne laga wo dard ka qissa zamin par

jo ashk meri aankh se Tapka zamin par

ek man talash-e-rizq mein ghar se nikal paDi

rakh kar niDhaal bhuk se bachcha zamin par

tum ko kisi jagah na mukammal milunga main

aadha hun aasman pe aadha zamin par

'azwar' mili na un ko lahad ke liye jagah

karte the zindagi mein jo qabza zamin par