lillahil-hamd ki dil shola-fishan hai ab tak

lillāhil-hamd ki dil shola-fishāñ hai ab tak

piir hai jism magar tab.a javāñ hai ab tak

barf-bārī hai mah o saal kī sar par lekin

ḳhuun meñ garmi-e-pahlu-e-butāñ hai ab tak

sar pe har chand mah o saal kā ġhaltāñ hai ġhubār

fikr meñ tāb-o-tab-e-kāhkashāñ hai ab tak

kab se nabzoñ meñ vo jhankār nahīñ hai phir bhī

sher meñ zamzama-e-āb-e-ravāñ hai ab tak

lillāhil-hamd ki darbār-e-ḳharābāt kī ḳhaak

surma-e-dīda-e-sāhib-nazrāñ hai ab tak

zindagī kab se hai kāñToñ kī tijārat se figār

phir bhī taḳh.īl meñ phūloñ kī dukāñ hai ab tak

farq par vaqt kā pathrāo hai kab se jaarī

zehn meñ kārgah-e-shīshagarāñ hai ab tak

kis se kahiye ki ba-īñ fikr mirā tār-e-vajūd

zaḳhma-e-ġhaib se larzāñ o tapāñ hai ab tak

kab se huuñ munkir-e-gulbāñg-e-malā.ek phir bhī

dil pe jibrīl kī dastak kā gumāñ hai ab tak

kab se huuñ basta-e-nāqūs-o-mazāmīr-e-butāñ

phir bhī siine meñ koī garm-azāñ hai ab tak

saḳht hairāñ huuñ ki is kufr ke jañgal meñ bhī 'josh'

chashm-e-yazdāñ mirī jānib nigrāñ hai ab tak

lillahil-hamd ki dil shola-fishan hai ab tak

pir hai jism magar taba jawan hai ab tak

barf-bari hai mah o sal ki sar par lekin

KHun mein garmi-e-pahlu-e-butan hai ab tak

sar pe har chand mah o sal ka ghaltan hai ghubar

fikr mein tab-o-tab-e-kahkashan hai ab tak

kab se nabzon mein wo jhankar nahin hai phir bhi

sher mein zamzama-e-ab-e-rawan hai ab tak

lillahil-hamd ki darbar-e-KHarabaat ki KHak

surma-e-dida-e-sahib-nazran hai ab tak

zindagi kab se hai kanTon ki tijarat se figar

phir bhi taKHil mein phulon ki dukan hai ab tak

farq par waqt ka pathrao hai kab se jari

zehn mein kargah-e-shishagaran hai ab tak

kis se kahiye ki ba-in fikr mera tar-e-wajud

zaKHma-e-ghaib se larzan o tapan hai ab tak

kab se hun munkir-e-gulbang-e-malaek phir bhi

dil pe jibril ki dastak ka guman hai ab tak

kab se hun basta-e-naqus-o-mazamir-e-butan

phir bhi sine mein koi garm-azan hai ab tak

saKHt hairan hun ki is kufr ke jangal mein bhi 'josh'

chashm-e-yazdan meri jaanib nigran hai ab tak