lipaT rahi hain salaKHen hamein juda na karo

lipaT rahī haiñ salāḳheñ hameñ judā na karo

jo qaid kar hī liyā hai to phir rihā na karo

na jaane kaun ho muḳhbir yahāñ pe hākim kā

baġhāvatoñ ke liye sab se yuuñ kahā na karo

kahīñ muhāl na ho jaa.e muskurānā bhī

kisī ke ishq meñ ho us kā tazkira na karo

parinde khiḌkī pe baiThe haiñ kaam par jaa.eñ

tum itnī der se ai jān-e-man uThā na karo

manā bhī karte ho phir ḳhud hī chuum lete ho

manā kiyā na karo yā to phir kiyā na karo

har ek shaḳhs yahāñ bas ḳhabar hī DhūñDhtā hai

hamārā naam bhī yūñhī kahīñ liyā na karo

lipaT rahi hain salaKHen hamein juda na karo

jo qaid kar hi liya hai to phir riha na karo

na jaane kaun ho muKHbir yahan pe hakim ka

baghawaton ke liye sab se yun kaha na karo

kahin muhaal na ho jae muskurana bhi

kisi ke ishq mein ho us ka tazkira na karo

parinde khiDki pe baiThe hain kaam par jaen

tum itni der se ai jaan-e-man uTha na karo

mana bhi karte ho phir KHud hi chum lete ho

mana kiya na karo ya to phir kiya na karo

har ek shaKHs yahan bas KHabar hi DhunDhta hai

hamara nam bhi yunhi kahin liya na karo