liya jannat mein bhi dozaKH ka sahaara humne

liyā jannat meñ bhī dozaḳh kā sahārā ham ne

āshiyāñ barq ke tinkoñ se sañvārā ham ne

husn-e-ā.īna-e-ġhairat ko sañvārā ham ne

na liyā ishq meñ apnā bhī sahārā ham ne

naqsh faanī hī rahā rañg-e-baqā chaḌh na sakā

umr bhar ālam-e-imkāñ ko sañvārā ham ne

har nafas marsiya thā sā.at-e-bedārī kā

laakh soī huī qismat ko pukārā ham ne

haa.e ai maslahat-e-vaqt duhā.ī terī

kar lī nā-ahl kī tanqīd gavārā ham ne

phir bhī peshānī-e-tūfāñ pe shikan baaqī hai

Dūbte vaqt bhī dekhā na kinārā ham ne

dhaḌkaneñ dil kī bhī shāhid haiñ ḳhudā bhī hai gavāh

ham pe jab vaqt paḌā tum ko pukārā ham ne

sāya-e-gul meñ kahāñ fitrat-e-āzād ko chain

har taḌaptī huī bijlī ko pukārā ham ne

liya jannat mein bhi dozaKH ka sahaara hum ne

aashiyan barq ke tinkon se sanwara hum ne

husn-e-aina-e-ghairat ko sanwara hum ne

na liya ishq mein apna bhi sahaara hum ne

naqsh fani hi raha rang-e-baqa chaDh na saka

umr bhar aalam-e-imkan ko sanwara hum ne

har nafas marsiya tha saat-e-bedari ka

lakh soi hui qismat ko pukara hum ne

hae ai maslahat-e-waqt duhai teri

kar li na-ahl ki tanqid gawara hum ne

phir bhi peshani-e-tufan pe shikan baqi hai

Dubte waqt bhi dekha na kinara hum ne

dhaDkanen dil ki bhi shahid hain KHuda bhi hai gawah

hum pe jab waqt paDa tum ko pukara hum ne

saya-e-gul mein kahan fitrat-e-azad ko chain

har taDapti hui bijli ko pukara hum ne