لو اپنے نام جنت کر رہا ہوں

لو اپنے نام جنت کر رہا ہوں

میں اپنی ماں کی خدمت کر رہا ہوں

مٹا کر رکھ نہ دے فرقہ پرستی

سدھر جاؤ نصیحت کر رہا ہوں

سمندر روٹھ کر بیٹھا ہے مجھ سے

میں قطرہ کی حمایت کر رہا ہوں

تری یادوں کو غزلوں میں سجا کر

امانت میں خیانت کر رہا ہوں

مجھے معلوم ہے میرا مقدر

حریفوں سے محبت کر رہا ہوں

لگا یوں دیکھ کر ویراں حویلی

گو خود اپنی زیارت کر رہا ہوں

تبسم بھی جہاں بدعت ہے غوریؔ

میں ہنسنے کی جسارت کر رہا ہوں