lo Dub gaya farsh-e-‘aza dida-e-nam se

lo Duub gayā farsh-e-‘azā dīda-e-nam se

ab koī na girye kā taqāzā kare ham se

khaTkā hai ki sailāb-e-junūñ-ḳhez ke hāthoñ

gir jaa.e kahīñ jism kī dīvār na dham se

shah ko mire inkār se mā'lūm huā hai

har ik ko ḳharīdā nahīñ jā saktā raqam se

ham log bhī kyā saada haiñ taskīn kī ḳhātir

ummīd lagā lete haiñ patthar ke sanam se

afsos ki maqtal meñ tah-e-teġh-o-tabar hai

māñ-bāp ne paalā thā jise nāz-o-ni’am se

mat pūchh ki andar se haiñ kis darja shikasta

jo log bazāhir nazar aate haiñ baham se

ab aa ke mujhe ranj kī rāhat huī hāsil

pahle maiñ samajhtā thā ki mar jā.uñgā ġham se

mujh-dil ko faqat qarya-e-barbād na samjho

ik vaqt ye sarsabz 'ilāqa thā qasam se

lo Dub gaya farsh-e-‘aza dida-e-nam se

ab koi na girye ka taqaza kare hum se

khaTka hai ki sailab-e-junun-KHez ke hathon

gir jae kahin jism ki diwar na dham se

shah ko mere inkar se ma'lum hua hai

har ek ko KHarida nahin ja sakta raqam se

hum log bhi kya sada hain taskin ki KHatir

ummid laga lete hain patthar ke sanam se

afsos ki maqtal mein tah-e-tegh-o-tabar hai

man-bap ne pala tha jise naz-o-ni’am se

mat puchh ki andar se hain kis darja shikasta

jo log bazahir nazar aate hain baham se

ab aa ke mujhe ranj ki rahat hui hasil

pahle main samajhta tha ki mar jaunga gham se

mujh-dil ko faqat qarya-e-barbaad na samjho

ek waqt ye sarsabz 'ilaqa tha qasam se