لوگ اپنی تصویریں وقت سے چھپاتے ہیں

لوگ اپنی تصویریں وقت سے چھپاتے ہیں

عکس تو حقیقت کے آئنے دکھاتے ہیں

خوشبوؤں میں پھولوں کی اہل دل نہاتے ہیں

بن سنور کے محفل میں آپ جب بھی آتے ہیں

زندگی کی راہوں میں پھول مسکراتے ہیں

لوگ صنف نازک سے قربتیں بڑھاتے ہیں

کیسے بھول جاؤں میں دھندلی دھندلی یادوں کو

یہ خیال تو میری ہمتیں بڑھاتے ہیں

کیا حسین رشتہ تھا چاندنی کا آنگن سے

آج بھی نگاہوں میں خواب جگمگاتے ہیں

شام سے نکلتے ہیں رات کا سفر لے کر

انتظار کے سورج صبح ڈوب جاتے ہیں

کب مزاج بدلے گا زندگی کے موسم کا

پھول سے بدن والے ہم سے خار کھاتے ہیں

رات بھیگ جاتی ہے جگنوؤں کی بارش سے

جھٹپٹے میں وہ اکثر گیت گنگناتے ہیں

شکل کب بدل جائے ڈر ہے اس لیے ثروتؔ

گھر پہ لوگ ناموں کی تختیاں لگاتے ہیں