log bhi kya hain kisi ka dil dukha kar KHush hue

log bhī kyā haiñ kisī kā dil dukhā kar ḳhush hue

phuul par baiThī huī titlī uḌā kar ḳhush hue

pyaas ham apnī bujhā leñ ye ijāzat hai kahāñ

phir bhī ai dariyā tire nazdīk aakar ḳhush hue

marz ko paale hue rakhnā samajhdārī nahīñ

log phir bhī ḳhāmiyāñ apnī chhupā kar ḳhush hue

shakl-o-sūrat dekhne laa.iq thī tab sayyād kī

qaid panchhī jab paroñ ko phaḌphaḌā kar ḳhush hue

āḳhirash karte bhī kyā jab class meñ teacher na thā

saare bachcha bachchiyāñ ūdham machā kar ḳhush hue

bojh dil kā ek hī jhaTke meñ halqa ho gayā

ham tumhārī yaad meñ ḳhud ko rulā kar ḳhush hue

ai 'akelā' aur kyā honā thā bas itnā huā

sar-phire jhoñke charāġhoñ ko bujhā kar ḳhush hue

log bhi kya hain kisi ka dil dukha kar KHush hue

phul par baiThi hui titli uDa kar KHush hue

pyas hum apni bujha len ye ijazat hai kahan

phir bhi ai dariya tere nazdik aakar KHush hue

marz ko pale hue rakhna samajhdari nahin

log phir bhi KHamiyan apni chhupa kar KHush hue

shakl-o-surat dekhne laiq thi tab sayyaad ki

qaid panchhi jab paron ko phaDphaDa kar KHush hue

aaKHirash karte bhi kya jab class mein teacher na tha

sare bachcha bachchiyan udham macha kar KHush hue

bojh dil ka ek hi jhaTke mein halqa ho gaya

hum tumhaari yaad mein KHud ko rula kar KHush hue

ai 'akela' aur kya hona tha bas itna hua

sar-phire jhonke charaghon ko bujha kar KHush hue