log jam-o-subu mein khoe rahe

log jām-o-subū meñ kho.e rahe

ham tirī aarzū meñ kho.e rahe

zindagī kī thī justujū ham ko

umr bhar justujū meñ kho.e rahe

mahfil-e-rañg-o-bū to mil na sakī

ḳhvāhish-e-rañg-o-bū meñ kho.e rahe

ashk jo bach rahe the āñkhoñ meñ

hurmat-e-ābrū meñ kho.e rahe

har taraf thā hisār kāñToñ kā

phuul fikr-e-numū meñ kho.e rahe

kyā tasavvur thā chashm-e-sāqī kā

raat bhar ham subū meñ kho.e rahe

shauq-e-āvārgī na pūchh 'ziyā'

lazzat-e-kū-ba-kū meñ kho.e rahe

log jam-o-subu mein khoe rahe

hum teri aarzu mein khoe rahe

zindagi ki thi justuju hum ko

umr bhar justuju mein khoe rahe

mahfil-e-rang-o-bu to mil na saki

KHwahish-e-rang-o-bu mein khoe rahe

ashk jo bach rahe the aankhon mein

hurmat-e-abru mein khoe rahe

har taraf tha hisar kanTon ka

phul fikr-e-numu mein khoe rahe

kya tasawwur tha chashm-e-saqi ka

raat bhar hum subu mein khoe rahe

shauq-e-awargi na puchh 'ziya'

lazzat-e-ku-ba-ku mein khoe rahe