log kahte hain ki suraj mein andhera kyun hai

log kahte haiñ ki sūraj meñ añdherā kyuuñ hai

dhuup niklī hai ġhalat baat kā charchā kyuuñ hai

zindagī se nahīñ jab tum ko koī dilchaspī

chand lamhoñ kī masarrat kā taqāzā kyuuñ hai

paḌhne vāloñ ke diloñ par ho sadāqat kā asar

aisī tahrīr vo likhtā hai to likhtā kyuuñ hai

apne markaz pe jise lauT kar aanā hī paḌā

dekh kar aa.ina ab chehra chhuptā kyuuñ hai

Dar rahā huuñ ki musībat na kahīñ aa jaa.e

zehn meñ tezī se ehsās ye ubhrā kyuuñ hai

mujh se nafrat hai to iz.hār kabhī bhī na kiyā

vo farishta hai to kuchh kahne se Dartā kyuuñ hai

yaad hogī tumheñ pahle kī har ik baat 'hasīr'

phir mohabbat se use tum ne navāzā kyuuñ hai

log kahte hain ki suraj mein andhera kyun hai

dhup nikli hai ghalat baat ka charcha kyun hai

zindagi se nahin jab tum ko koi dilchaspi

chand lamhon ki masarrat ka taqaza kyun hai

paDhne walon ke dilon par ho sadaqat ka asar

aisi tahrir wo likhta hai to likhta kyun hai

apne markaz pe jise lauT kar aana hi paDa

dekh kar aaina ab chehra chhupta kyun hai

Dar raha hun ki musibat na kahin aa jae

zehn mein tezi se ehsas ye ubhra kyun hai

mujh se nafrat hai to izhaar kabhi bhi na kiya

wo farishta hai to kuchh kahne se Darta kyun hai

yaad hogi tumhein pahle ki har ek baat 'hasir'

phir mohabbat se use tum ne nawaza kyun hai