log kya kya guftugu ke darmiyan khulne lage

log kyā kyā guftugū ke darmiyāñ khulne lage

zikr-e-yārāñ chal paḌā to rāz-dāñ khulne lage

phir paḌāo Dal ga.e yādoñ ke shām-e-hijr meñ

aur fasīl-e-shahr-e-jāñ par kārvāñ khulne lage

tang shahroñ meñ khule sāgar kī bāteñ kyā chalīñ

bād-e-hijrat chal paḌī aur bādbāñ khulne lage

jab se dil kā aa.ina shaffāf rakhnā aa gayā

merī āñkhoñ par ka.ī 'aks-e-nihāñ khulne lage

dil kī shiryānoñ meñ taaza ġham ik aise jam gayā

sab purāne zaḳhm-hā-e-be-nishāñ khulne lage

tere ġham kā muhr-basta goshvāra kyā khulā

'umr bhar ke daftar-e-sūd-o-ziyāñ khulne lage

muddatoñ se ham-nashīñ the ham-nishāt-o-ham-tarab

mubtalā-e-ġham huā to mehrbāñ khulne lage

log kya kya guftugu ke darmiyan khulne lage

zikr-e-yaran chal paDa to raaz-dan khulne lage

phir paDao Dal gae yaadon ke sham-e-hijr mein

aur fasil-e-shahr-e-jaan par karwan khulne lage

tang shahron mein khule sagar ki baaten kya chalin

baad-e-hijrat chal paDi aur baadban khulne lage

jab se dil ka aaina shaffaf rakhna aa gaya

meri aankhon par kai 'aks-e-nihan khulne lage

dil ki shiryanon mein taza gham ek aise jam gaya

sab purane zaKHm-ha-e-be-nishan khulne lage

tere gham ka muhr-basta goshwara kya khula

'umr bhar ke daftar-e-sud-o-ziyan khulne lage

muddaton se ham-nashin the ham-nishat-o-ham-tarab

mubtala-e-gham hua to mehrban khulne lage