log kyun DhunD rahe hain mujhe patthar le kar

log kyuuñ DhūñD rahe haiñ mujhe patthar le kar

maiñ to aayā nahīñ kirdār-e-payambar le kar

mujh ko mālūm hai mādūm huī naqd-e-vafā

phir bhī bāzār meñ baiThā huuñ muqaddar le kar

ruuh betāb hai chehroñ kā ta.assur paḌh kar

yaanī be-ghar huā maiñ shahr meñ ik ghar le kar

kis na.e lahje meñ ab ruuh kā iz.hār karūñ

saañs bhī chaltī hai ehsās kā ḳhanjar le kar

ye ġhalat hai ki maiñ pahchān gañvā baiThā huuñ

daar tak maiñ hī gayā harf-e-mukarrar le kar

mojaze ham se bhī hote haiñ payambar kī tarah

ham ne mābūd tarāshe fan-e-āzar le kar

ḳhud-kushī karne chalā huuñ mujhe roko 'tāriq'

zaḳhm-e-ehsās meñ chubhte hue nashtar le kar

log kyun DhunD rahe hain mujhe patthar le kar

main to aaya nahin kirdar-e-payambar le kar

mujh ko malum hai madum hui naqd-e-wafa

phir bhi bazar mein baiTha hun muqaddar le kar

ruh betab hai chehron ka tassur paDh kar

yani be-ghar hua main shahr mein ek ghar le kar

kis nae lahje mein ab ruh ka izhaar karun

sans bhi chalti hai ehsas ka KHanjar le kar

ye ghalat hai ki main pahchan ganwa baiTha hun

dar tak main hi gaya harf-e-mukarrar le kar

mojaze hum se bhi hote hain payambar ki tarah

hum ne mabud tarashe fan-e-azar le kar

KHud-kushi karne chala hun mujhe roko 'tariq'

zaKHm-e-ehsas mein chubhte hue nashtar le kar