log nafrat ki jab is aag se jal jaenge

log nafrat kī jab is aag se jal jā.eñge

mujh ko ummīd hai hālāt badal jā.eñge

jo the maujūd mirī jeb meñ khoTe sikke

maiñ samajhtā thā ki bāzār meñ chal jā.eñge

chhoḌ sakte haiñ mujhe race meñ pīchhe lekin

log kyā vaqt se aage bhī nikal jā.eñge

apne ashkoñ se bhigo deñge phir us kī buniyād

dekhne ham jo kabhī tāj-mahal jā.eñge

ai mirī maut mujhe sote samay mat aanā

tere pairoñ se mire ḳhvāb kuchal jā.eñge

mere beTe tū khilaune ke liye zid mat kar

aaj rahne de bahut dhuup hai kal jā.eñge

mujh se ab aap kī tārīf na ho pā.egī

aap kam-zarf haiñ shohrat se uchhal jā.eñge

gungunā.eñgī jise paḌh ke ka.ī nasleñ tirī

ham tirī mez pe rakh kar vo ġhazal jā.eñge

log nafrat ki jab is aag se jal jaenge

mujh ko ummid hai haalat badal jaenge

jo the maujud meri jeb mein khoTe sikke

main samajhta tha ki bazar mein chal jaenge

chhoD sakte hain mujhe race mein pichhe lekin

log kya waqt se aage bhi nikal jaenge

apne ashkon se bhigo denge phir us ki buniyaad

dekhne hum jo kabhi taj-mahal jaenge

ai meri maut mujhe sote samay mat aana

tere pairon se mere KHwab kuchal jaenge

mere beTe tu khilaune ke liye zid mat kar

aaj rahne de bahut dhup hai kal jaenge

mujh se ab aap ki tarif na ho paegi

aap kam-zarf hain shohrat se uchhal jaenge

gungunaengi jise paDh ke kai naslen teri

hum teri mez pe rakh kar wo ghazal jaenge