log subh o sham ki nairangiyan dekha kiye

log sub.h o shaam kī nairañgiyāñ dekhā kiye

aur ham chup-chāp maazī ke nishāñ dekhā kiye

aql to kartī rahī dāmān-e-hastī chaak chaak

ham magar dast-e-junūñ meñ dhajjiyāñ dekhā kiye

ḳhanjaroñ kī thī numā.ish har galī har moḌ par

aur ham kamre meñ tasvīr-e-butāñ dekhā kiye

ham tan-āsānī ke ḳhūgar DhūñDte manzil kahāñ

duur hī se gard-e-rāh-e-kārvāñ dekhā kiye

ham ko is kī kyā ḳhabar gulshan kā gulshan jal gayā

ham to apnā sirf apnā āshiyāñ dekhā kiye

mausam-e-parvāz ne 'najmī' pukārā thā magar

par sameTe ham qafas kī tīliyāñ dekhā kiye

log subh o sham ki nairangiyan dekha kiye

aur hum chup-chap mazi ke nishan dekha kiye

aql to karti rahi daman-e-hasti chaak chaak

hum magar dast-e-junun mein dhajjiyan dekha kiye

KHanjaron ki thi numaish har gali har moD par

aur hum kamre mein taswir-e-butan dekha kiye

hum tan-asani ke KHugar DhunDte manzil kahan

dur hi se gard-e-rah-e-karwan dekha kiye

hum ko is ki kya KHabar gulshan ka gulshan jal gaya

hum to apna sirf apna aashiyan dekha kiye

mausam-e-parwaz ne 'najmi' pukara tha magar

par sameTe hum qafas ki tiliyan dekha kiye