logon ke dard apni pashemaniyan milin

logoñ ke dard apnī pashemāniyāñ milīñ

ham shāh-e-ġham the ham ko yahī rāniyāñ milīñ

sahrāoñ meñ bhī jā ke nazar aa.e sail-e-āb

dariyā se duur bhī hameñ tuġhyāniyāñ milīñ

aayā na phir vo daur ki jī bhar ke kheliye

bachpan ke ba.ad phir na vo nādāniyāñ milīñ

rah kar alag bhī saath rahā hai koī ḳhayāl

tanhā.ī meñ bhī ḳhud pe nigahbāniyāñ milīñ

paanī ke saath aks bhī bah kar chale ga.e

sūkhī nadī to phir vahī vīrāniyāñ milīñ

apnī hī aañkh par ga.e lamhoñ kā bojh thā

is kī nazar meñ to vahī jaulāniyāñ milīñ

baiThā rahā humā-e-sitam sar pe hī 'adīm'

har dasht-e-karb kī hameñ sultāniyāñ milīñ

logon ke dard apni pashemaniyan milin

hum shah-e-gham the hum ko yahi raniyan milin

sahraon mein bhi ja ke nazar aae sail-e-ab

dariya se dur bhi hamein tughyaniyan milin

aaya na phir wo daur ki ji bhar ke kheliye

bachpan ke baad phir na wo nadaniyan milin

rah kar alag bhi sath raha hai koi KHayal

tanhai mein bhi KHud pe nigahbaniyan milin

pani ke sath aks bhi bah kar chale gae

sukhi nadi to phir wahi viraniyan milin

apni hi aankh par gae lamhon ka bojh tha

is ki nazar mein to wahi jaulaniyan milin

baiTha raha huma-e-sitam sar pe hi 'adim'

har dasht-e-karb ki hamein sultaniyan milin