logon ke sabhi falsafe jhuTla to gae hum

logoñ ke sabhī falsafe jhuTlā to ga.e ham

dil jaise bhī samjhā chalo samjhā to ga.e ham

māyūs bhalā kyuuñ haiñ ye duniyā ke manāzir

ab āñkhoñ meñ bīnā.ī liye aa to ga.e ham

kis baat pe rūThe dar-o-dīvār-e-makāñ haiñ

kuchh der se aa.e haiñ magar aa to ga.e ham

ḳhud raakh hue sub.h talak sach hai ye lekin

ai raat tire jism ko pighlā to ga.e ham

ro.e hañse ujḌe base bichhḌe bhī mile bhī

dil saare tamāshe tujhe dikhlā to ga.e ham

kyuuñ hāshiye par aaj bhī rakhtī hai kahānī

kirdār nibhāne kā hunar pā to ga.e ham

ab baḌh ke zarā DhūñDh leñ manzil ke nishāñ bhī

uktā.e hue rāste bahlā to ga.e ham

sābun kī tarah ḳhud ko galānā paḌā be-shak

par lafz-e-mohabbat tujhe chamkā to ga.e ham

logon ke sabhi falsafe jhuTla to gae hum

dil jaise bhi samjha chalo samjha to gae hum

mayus bhala kyun hain ye duniya ke manazir

ab aankhon mein binai liye aa to gae hum

kis baat pe ruThe dar-o-diwar-e-makan hain

kuchh der se aae hain magar aa to gae hum

KHud rakh hue subh talak sach hai ye lekin

ai raat tere jism ko pighla to gae hum

roe hanse ujDe base bichhDe bhi mile bhi

dil sare tamashe tujhe dikhla to gae hum

kyun hashiye par aaj bhi rakhti hai kahani

kirdar nibhane ka hunar pa to gae hum

ab baDh ke zara DhunDh len manzil ke nishan bhi

uktae hue raste bahla to gae hum

sabun ki tarah KHud ko galana paDa be-shak

par lafz-e-mohabbat tujhe chamka to gae hum