logon ki malamat bhi hai KHud dard-sari bhi

logoñ kī malāmat bhī hai ḳhud dard-sarī bhī

kis kaam kī ye apnī vasī.a-un-nazarī bhī

kyā jāniye kyuuñ sust thī kal zehan kī raftār

mumkin hui tāroñ se mirī ham-safarī bhī

rātoñ ko kalī ban ke chaTaktā thā tirā jism

dhoke meñ chalī aa.ī nasīm-e-saharī bhī

ḳhud apne shab-o-roz guzar jā.eñge lekin

shāmil hai mire ġham meñ tirī dar-ba-darī bhī

furqat ke shab-o-roz meñ kyā kuchh nahīñ hotā

qudarat pe malāmat bhī duā-e-saharī bhī

ik fard kī ulfat to baḌī kam-nazarī hai

hai kis meñ magar ahliyat-e-kam-nazarī bhī

logon ki malamat bhi hai KHud dard-sari bhi

kis kaam ki ye apni wasia-un-nazari bhi

kya jaaniye kyun sust thi kal zehan ki raftar

mumkin hui taron se meri ham-safari bhi

raaton ko kali ban ke chaTakta tha tera jism

dhoke mein chali aai nasim-e-sahari bhi

KHud apne shab-o-roz guzar jaenge lekin

shamil hai mere gham mein teri dar-ba-dari bhi

furqat ke shab-o-roz mein kya kuchh nahin hota

qudarat pe malamat bhi dua-e-sahari bhi

ek fard ki ulfat to baDi kam-nazari hai

hai kis mein magar ahliyat-e-kam-nazari bhi