لوگوں نے جس پرند کو سمجھا کہ مر گیا

لوگوں نے جس پرند کو سمجھا کہ مر گیا

ٹوٹے پروں کو جوڑ کے پرواز کر گیا

اک چیز بھی قرینے کی بازار میں نہیں

فن کار ختم ہو گئے دست ہنر گیا

دروازے کھڑکیوں سے نہیں چھن سکی جو دھوپ

دیوار پر چڑھا ہوا سورج اتر گیا

اس بار تم کو راس نہ آئیں گی ہجرتیں

گر پاؤں بچ گئے تو سمجھ لو کہ سر گیا

موسم کی ہے نگاہ بہت دن سے اس طرف

آندھی چلی تو اب کے یہ بوڑھا شجر گیا

شاخوں سے اپنی ہو گئے جاویدؔ ہم جدا

پتوں کی طرح فکر کا منظر بکھر گیا