logon ne jis parind ko samjha ki mar gaya

logoñ ne jis parind ko samjhā ki mar gayā

TuuTe paroñ ko joḌ ke parvāz kar gayā

ik chiiz bhī qarīne kī bāzār meñ nahīñ

fankār ḳhatm ho ga.e dast-e-hunar gayā

darvāze khiḌkiyoñ se nahīñ chhan sakī jo dhuup

dīvār par chaḌhā huā sūraj utar gayā

is baar tum ko raas na ā.eñgī hijrateñ

gar paañv bach ga.e to samajh lo ki sar gayā

mausam kī hai nigāh bahut din se is taraf

āñdhī chalī to ab ke ye būḌhā shajar gayā

shāḳhoñ se apnī ho ga.e 'jāved' ham judā

pattoñ kī tarah fikr kā manzar bikhar gayā

logon ne jis parind ko samjha ki mar gaya

TuTe paron ko joD ke parwaz kar gaya

ek chiz bhi qarine ki bazar mein nahin

fankar KHatm ho gae dast-e-hunar gaya

darwaze khiDkiyon se nahin chhan saki jo dhup

diwar par chaDha hua suraj utar gaya

is bar tum ko ras na aaengi hijraten

gar panw bach gae to samajh lo ki sar gaya

mausam ki hai nigah bahut din se is taraf

aandhi chali to ab ke ye buDha shajar gaya

shaKHon se apni ho gae 'jawed' hum juda

patton ki tarah fikr ka manzar bikhar gaya