lunj wo pa-e-talab hun kahin ja hi na sakun

lunj vo pā-e-talab huuñ kahīñ jā hī na sakūñ

shal ye ho dast-e-havas haath baḌhā hī na sakūñ

zid ye us ko hai jo royā maiñ bhī chhup kar jā.ūñ

khol dī aañkh nazar ḳhvāb meñ aa hī na sakūñ

dekh kar husn butoñ kā jo ḳhudā se phir jaa.e

dil-e-gumrāh ko phir raah pe lā hī na sakūñ

madad ai dast-e-junūñ pairahan-e-gul kī tarah

ye phaTe jāma-e-aslī ki silā hī na sakūñ

yā ilāhī shab-e-vaslat jo kahe jaane ko

paañv so jaa.eñ ye us ke ki jagā hī na sakūñ

maiñ vo ġham-ḳhvār huuñ ġham aañkh kī putlī kā tirī

dāna-e-ḳhāl nahīñ hai ki jo khā hī na sakūñ

husn-e-mahfil hai to hone do usī ḳhalvat meñ

band quliyān nahīñ haiñ jo bulā hī na sakūñ

sifat saaya vo ik jān-e-do-qālib huuñ maiñ

duur ho laakh kabhī paas se jā hī na sakūñ

nazar uftāda vo huuñ ashk-e-chakīda kī tarah

girūñ āñkhoñ se to nazroñ meñ samā hī na sakūñ

ai kamāñ-dār jo tū mujh ko bulā.e sau baar

tīr-e-jasta maiñ nahīñ huuñ ki phir aa hī na sakūñ

ai sanam jo tū na maan.e ho tirī mahfil se

ġhair kyā naaz tirā hai ki uThā hī na sakūñ

na sahī vasf-e-dahan baal to suljhāne do

zulf kuchh baat nahīñ hai jo banā hī na sakūñ

khā.ūñ saugand pe sahvan qasam ai but tirī

qasmiya bhī jo maiñ khā.ūñ kabhī khā hī na sakūñ

ta.ana-e-ġhair se ai zo.af jo baiThe dil-e-zār

baat vo bār-e-garāñ ho ki uThā hī na sakūñ

kyā tamāshā hai ki nazroñ meñ hai lekin ai 'shād'

qurb-e-shah-rag maiñ jo DhūñDūñ use pā hī na sakūñ

lunj wo pa-e-talab hun kahin ja hi na sakun

shal ye ho dast-e-hawas hath baDha hi na sakun

zid ye us ko hai jo roya main bhi chhup kar jaun

khol di aankh nazar KHwab mein aa hi na sakun

dekh kar husn buton ka jo KHuda se phir jae

dil-e-gumrah ko phir rah pe la hi na sakun

madad ai dast-e-junun pairahan-e-gul ki tarah

ye phaTe jama-e-asli ki sila hi na sakun

ya ilahi shab-e-waslat jo kahe jaane ko

panw so jaen ye us ke ki jaga hi na sakun

main wo gham-KHwar hun gham aankh ki putli ka teri

dana-e-KHal nahin hai ki jo kha hi na sakun

husn-e-mahfil hai to hone do usi KHalwat mein

band quliyan nahin hain jo bula hi na sakun

sifat saya wo ek jaan-e-do-qalib hun main

dur ho lakh kabhi pas se ja hi na sakun

nazar uftada wo hun ashk-e-chakida ki tarah

girun aankhon se to nazron mein sama hi na sakun

ai kaman-dar jo tu mujh ko bulae sau bar

tir-e-jasta main nahin hun ki phir aa hi na sakun

ai sanam jo tu na mane ho teri mahfil se

ghair kya naz tera hai ki uTha hi na sakun

na sahi wasf-e-dahan baal to suljhane do

zulf kuchh baat nahin hai jo bana hi na sakun

khaun saugand pe sahwan qasam ai but teri

qasmiya bhi jo main khaun kabhi kha hi na sakun

tana-e-ghair se ai zoaf jo baiThe dil-e-zar

baat wo bar-e-garan ho ki uTha hi na sakun

kya tamasha hai ki nazron mein hai lekin ai 'shad'

qurb-e-shah-rag main jo DhunDun use pa hi na sakun