luT gae misr ka bazar lagane wale

luT ga.e misr kā bāzār lagāne vaale

so ga.e ḳhvāb kī tā'bīr batāne vaale

apnī marzī se jo ik phuul khilā sakte nahīñ

aa ga.e sab ko hare baaġh dikhāne vaale

aisā hotā hai siyāsat kā bhayānak chehra

laash uThāte haiñ vahī laash girāne vaale

aisī dā'vat to kisī ne bhī nahīñ kī hogī

apne mehmāñ ko añdhere meñ khilāne vaale

sahmā sahmā sā nazar aatā hai būḌhā bargad

ab parinde haiñ kahāñ shor machāne vaale

laḌkiyāñ sāñvle rangoñ kī kuñvārī hī rahīñ

sab ke sab mar ga.e majnūñ ke gharāne vaale

be-suroñ se to mirā duur kā rishta bhī nahīñ

maiñ vo naġhma huuñ jise gā ga.e gaane vaale

luT gae misr ka bazar lagane wale

so gae KHwab ki ta'bir batane wale

apni marzi se jo ek phul khila sakte nahin

aa gae sab ko hare bagh dikhane wale

aisa hota hai siyasat ka bhayanak chehra

lash uThate hain wahi lash girane wale

aisi da'wat to kisi ne bhi nahin ki hogi

apne mehman ko andhere mein khilane wale

sahma sahma sa nazar aata hai buDha bargad

ab parinde hain kahan shor machane wale

laDkiyan sanwle rangon ki kunwari hi rahin

sab ke sab mar gae majnun ke gharane wale

be-suron se to mera dur ka rishta bhi nahin

main wo naghma hun jise ga gae gane wale