luT gaya dil kahan nahin malum

luT gayā dil kahāñ nahīñ ma.alūm

kyā huā hai ziyāñ nahīñ ma.alūm

ab qafas meñ hī rahne de sayyād

thā kahāñ āshiyāñ nahīñ ma.alūm

tū hī aa kar sikhā de o bulbul

mujh ko tarz-e-fuġhāñ nahīñ ma.alūm

aap hī se faqat hai dilchaspī

aur dilchaspiyāñ nahīñ ma.alūm

vaa.e taqdīr kyā qayāmat hai

jaa.e dard-e-nihāñ nahīñ ma.alūm

yaad hone lagī kahāñ apnī

aa.iiñ kyuuñ hichkiyāñ nahīñ ma.alūm

mujh ko terī kahānī aatī hai

aur koī dāstāñ nahīñ ma.alūm

maiñ azal se fidā.ī huuñ jis kā

us kā nām-o-nishāñ nahīñ ma.alūm

pairav-e-'mīr' huuñ maiñ'' ai 'nādir'

ġhair ko ye zabāñ nahīñ ma.alūm

luT gaya dil kahan nahin malum

kya hua hai ziyan nahin malum

ab qafas mein hi rahne de sayyaad

tha kahan aashiyan nahin malum

tu hi aa kar sikha de o bulbul

mujh ko tarz-e-fughan nahin malum

aap hi se faqat hai dilchaspi

aur dilchaspiyan nahin malum

wae taqdir kya qayamat hai

jae dard-e-nihan nahin malum

yaad hone lagi kahan apni

aain kyun hichkiyan nahin malum

mujh ko teri kahani aati hai

aur koi dastan nahin malum

main azal se fidai hun jis ka

us ka nam-o-nishan nahin malum

pairaw-e-'mir' hun main ai 'nadir'

ghair ko ye zaban nahin malum