luTao jaan to banti hai baat kis ne kaha

luTāo jaan to bantī hai baat kis ne kahā

ye bazm-e-ishq meñ rāz-e-hayāt kis ne kahā

rah-e-talab meñ sunātā koī tarāna-e-nau

yahāñ fasāna-e-zāt-o-sifāt kis ne kahā

abhī savābit-o-sayyār meñ hai fasl bahut

simaT chukī hai bahut kā.enāt kis ne kahā

har ek choT pe khultī hai aañkh insāñ kī

haiñ ḳhizr-e-rāh-e-talab hādsāt kis ne kahā

ham āsmāñ ko zamīñ par utaar laa.e magar

abhī nahīñ hai shu.ūr-e-hayāt kis ne kahā

ham apnī dhun meñ haiñ masrūf kis taraf dekheñ

hameñ nahīñ hai ġham-e-iltifāt kis ne kahā

hameñ sukūn mayassar nahīñ magar 'aḳhtar'

hamāre daur ko daur-e-najāt kis ne kahā

luTao jaan to banti hai baat kis ne kaha

ye bazm-e-ishq mein raaz-e-hayat kis ne kaha

rah-e-talab mein sunata koi tarana-e-nau

yahan fasana-e-zat-o-sifat kis ne kaha

abhi sawabit-o-sayyar mein hai fasl bahut

simaT chuki hai bahut kaenat kis ne kaha

har ek choT pe khulti hai aankh insan ki

hain KHizr-e-rah-e-talab hadsat kis ne kaha

hum aasman ko zamin par utar lae magar

abhi nahin hai shuur-e-hayat kis ne kaha

hum apni dhun mein hain masruf kis taraf dekhen

hamein nahin hai gham-e-iltifat kis ne kaha

hamein sukun mayassar nahin magar 'aKHtar'

hamare daur ko daur-e-najat kis ne kaha