lutf-e-bahaar mushfiq-e-man dekhte chalo

lutf-e-bahār mushfiq-e-man dekhte chalo

bulbul kā Dhañg rañg-e-chaman dekhte chalo

bāñkoñ ko bāñkpan ko milāo na ḳhaak meñ

tan tan ke yuuñ na apnā badan dekhte chalo

jaate agar ho kūcha-e-qātil kī sair ko

kapḌā bhī thoḌā bahr-e-kafan dekhte chalo

chashm-e-butān-e-dahr kī aafat haiñ shoḳhiyāñ

sahrā-e-husn ke bhī hiran dekhte chalo

kyā kar rahī hai pesha-e-mashshātgī bahār

ārā.ish-e-urūs-e-chaman dekhte chalo

kartī hai rāh-e-shauq meñ kis kis ko pā.emāl

raftār-e-yār ke bhī chalan dekhte chalo

aa.e ho said-gāh-e-jahāñ meñ to ai 'qalaq'

tarz-e-shikār-e-tīr-fagan dekhte chalo

lutf-e-bahaar mushfiq-e-man dekhte chalo

bulbul ka Dhang rang-e-chaman dekhte chalo

bankon ko bankpan ko milao na KHak mein

tan tan ke yun na apna badan dekhte chalo

jate agar ho kucha-e-qatil ki sair ko

kapDa bhi thoDa bahr-e-kafan dekhte chalo

chashm-e-butan-e-dahr ki aafat hain shoKHiyan

sahra-e-husn ke bhi hiran dekhte chalo

kya kar rahi hai pesha-e-mashshatgi bahaar

aaraish-e-urus-e-chaman dekhte chalo

karti hai rah-e-shauq mein kis kis ko paemal

raftar-e-yar ke bhi chalan dekhte chalo

aae ho said-gah-e-jahan mein to ai 'qalaq'

tarz-e-shikar-e-tir-fagan dekhte chalo