lutf-e-nigah-e-naz ki tohmat uThae kaun

lutf-e-nigāh-e-nāz kī tohmat uThā.e kaun

kuchh der kī bahār ko ḳhātir meñ laa.e kaun

dil chiiz kyā hai dil se mohabbat jatā.e kaun

apnā jo ḳhud na ho use apnā banā.e kaun

tere huzūr tujh se ḳhafā ho ke jaa.e kaun

zaḳhm-e-dil-e-tabāh pe nashtar lagā.e kaun

maanā harīm-e-nāz ke pardoñ meñ hai koī

lekin harīm-e-nāz ke parde uThā.e kaun

haañ haañ mujhe tumhāre taġhāful kā ġham nahīñ

is daur-e-ḳhudravī meñ kise āzmā.e kaun

paḌ jaa.e laakh vaqt magar ye nahīñ qubūl

maiñ dekhtā rahūñ ki mire kaam aa.e kaun

kaisī bahār kis ke sitāre kahāñ ke phuul

jab tum nahīñ to dīda-o-dil meñ kaun samā.e kaun

zauq-e-amal na zauq-e-junūñ har taraf sukūñ

jannat agar yahī hai to jannat meñ jaa.e kaun

mahfil meñ koī soḳhta-jāñ hī nahīñ 'shakīl'

soz-o-gudāz-e-sham.a pe aañsū bahā.e kaun

lutf-e-nigah-e-naz ki tohmat uThae kaun

kuchh der ki bahaar ko KHatir mein lae kaun

dil chiz kya hai dil se mohabbat jatae kaun

apna jo KHud na ho use apna banae kaun

tere huzur tujh se KHafa ho ke jae kaun

zaKHm-e-dil-e-tabah pe nashtar lagae kaun

mana harim-e-naz ke pardon mein hai koi

lekin harim-e-naz ke parde uThae kaun

han han mujhe tumhaare taghaful ka gham nahin

is daur-e-KHudrawi mein kise aazmae kaun

paD jae lakh waqt magar ye nahin qubul

main dekhta rahun ki mere kaam aae kaun

kaisi bahaar kis ke sitare kahan ke phul

jab tum nahin to dida-o-dil mein kaun samae kaun

zauq-e-amal na zauq-e-junun har taraf sukun

jannat agar yahi hai to jannat mein jae kaun

mahfil mein koi soKHta-jaan hi nahin 'shakil'

soz-o-gudaz-e-shama pe aansu bahae kaun