lutf-e-paiman bar bar kahan

lutf-e-paimān baar baar kahāñ

lazzat-e-soz-e-intizār kahāñ

kyā huiiñ be-qarāriyāñ dil kī

vo tamannā-e-vasl-e-yār kahāñ

vo taqāzā-e-shauq-e-dīd kujā

ruuh ko ab vo iztirār kahāñ

josh-e-vahshat ke vo maze na rahe

vo garebān-e-tār-tār kahāñ

mai-kashī kī vo baat jaatī rahī

ab vo mahfil vo mai-gusār kahāñ

maut aa jaa.e to ġhanīmat hai

un ke aane kā e'tibār kahāñ

aa ki do-chār din kī zindagī hai

koī aatā hai bār-bār kahāñ

maiñ to lahore se chalā jā.ūñ

jā.egī fikr-e-rozgār kahāñ

kis ko 'sā.ib' farāġh hāsil hai

maiñ kahāñ mausam-e-bahār kahāñ

lutf-e-paiman bar bar kahan

lazzat-e-soz-e-intizar kahan

kya huin be-qarariyan dil ki

wo tamanna-e-wasl-e-yar kahan

wo taqaza-e-shauq-e-did kuja

ruh ko ab wo iztirar kahan

josh-e-wahshat ke wo maze na rahe

wo gareban-e-tar-tar kahan

mai-kashi ki wo baat jati rahi

ab wo mahfil wo mai-gusar kahan

maut aa jae to ghanimat hai

un ke aane ka e'tibar kahan

aa ki do-chaar din ki zindagi hai

koi aata hai bar-bar kahan

main to lahore se chala jaun

jaegi fikr-e-rozgar kahan

kis ko 'saib' faragh hasil hai

main kahan mausam-e-bahaar kahan