lutf ka dije sabaq husn-e-gharib-azar ko

lutf kā diije sabaq husn-e-ġharīb-āzār ko

pheñkiye ḳhanjar ko rakhiye haath se talvār ko

ab ye tūfān-e-musībat kam na hogā hashr tak

nabz Dūbegī Dubā kar aap ke bīmār ko

mai-kada hai vus.at-ābādī-e-ālam kā raaz

qatre meñ dariyā nazar aatā hai har mai-ḳhvār ko

ai mujāhid jehd-e-rang-e-ḳhāksārī hai zarūr

toḌnā lāzim hai pahle is but-e-pindār ko

haañ mirī dīvāngī begāna-e-kulfat nahīñ

ābloñ ne rakh liyā hai dil meñ nok-e-ḳhār ko

apnī hadd-e-āḳhirī par ilm ban jaatā hai jehl

be-ḳhudī lāzim hai ai dil hasrat-e-dīdār ko

hai sukūn-e-qalb-e-muztar shāhid-e-taskīn-e-dard

kyoñ na ho ummīd sehat kī tire bīmār ko

ye bhī ik e.ajāz thā 'mas.ūd' husn-e-dost kā

dekhte hī dekhte hosh aa gayā bīmār ko

lutf ka dije sabaq husn-e-gharib-azar ko

phenkiye KHanjar ko rakhiye hath se talwar ko

ab ye tufan-e-musibat kam na hoga hashr tak

nabz Dubegi Duba kar aap ke bimar ko

mai-kada hai wusat-abaadi-e-alam ka raaz

qatre mein dariya nazar aata hai har mai-KHwar ko

ai mujahid jehd-e-rang-e-KHaksari hai zarur

toDna lazim hai pahle is but-e-pindar ko

han meri diwangi begana-e-kulfat nahin

aablon ne rakh liya hai dil mein nok-e-KHar ko

apni hadd-e-aKHiri par ilm ban jata hai jehl

be-KHudi lazim hai ai dil hasrat-e-didar ko

hai sukun-e-qalb-e-muztar shahid-e-taskin-e-dard

kyon na ho ummid sehat ki tere bimar ko

ye bhi ek eajaz tha 'masud' husn-e-dost ka

dekhte hi dekhte hosh aa gaya bimar ko