lutf le le ke piye hain qadah-e-gham kya kya

lutf le le ke piye haiñ qadah-e-ġham kyā kyā

ham ne firdaus banā.e haiñ jahannam kyā kyā

āñsuoñ ko bhī piyā jur.a-e-sahbā kī tarah

sāġhar-o-jām bane dīda-e-pur-nam kyā kyā

halqa-e-dām-e-vafā uqda-e-ġham mauj-e-nashāt

ye zamāna bhī dikhātā hai cham-o-ḳham kyā kyā

lazzat-e-hijr kabhī ishrat-e-dīdār kabhī

aarzū ne bhī tabī.at ko diye dam kyā kyā

kis kis andāz se khaTke rag-e-gul ke nashtar

tapish-afroz hue sho.ala-o-shabnam kyā kyā

shām-e-vīrāñ kī udāsī shab-e-tīra kā sukūt

dil-e-mahzūñ ko mile hamdam o mahram kyā kyā

haa.e vo ālam-e-be-nām ki jis aalam meñ

biit jaate haiñ dil-e-zār pe aalim kyā kyā

ismat o rif.at-e-anjum se ḳhayāl aatā hai

ḳhaak meñ roñdī ga.ī hurmat-e-ādam kyā kyā

dab ga.e minnat-e-mazdūr se aivāñ kitne

jhuk ga.e ġhairat-e-maftūh se parcham kyā kiyā

the musallah ġham-e-ma.ashūq se go ham 'aḳhtar'

phir bhī dikhlā.e ġham-e-dahr ne dam-ḳham kyā kyā

lutf le le ke piye hain qadah-e-gham kya kya

hum ne firdaus banae hain jahannam kya kya

aansuon ko bhi piya jura-e-sahba ki tarah

saghar-o-jam bane dida-e-pur-nam kya kya

halqa-e-dam-e-wafa uqda-e-gham mauj-e-nashat

ye zamana bhi dikhata hai cham-o-KHam kya kya

lazzat-e-hijr kabhi ishrat-e-didar kabhi

aarzu ne bhi tabiat ko diye dam kya kya

kis kis andaz se khaTke rag-e-gul ke nashtar

tapish-afroz hue shoala-o-shabnam kya kya

sham-e-viran ki udasi shab-e-tira ka sukut

dil-e-mahzun ko mile hamdam o mahram kya kya

hae wo aalam-e-be-nam ki jis aalam mein

bit jate hain dil-e-zar pe aalim kya kya

ismat o rifat-e-anjum se KHayal aata hai

KHak mein rondi gai hurmat-e-adam kya kya

dab gae minnat-e-mazdur se aiwan kitne

jhuk gae ghairat-e-maftuh se parcham kya kiya

the musallah gham-e-mashuq se go hum 'aKHtar'

phir bhi dikhlae gham-e-dahr ne dam-KHam kya kya