lutf-o-karam ka tere talabgar main bhi hun

lutf-o-karam kā tere talabgār maiñ bhī huuñ

yā-rab ḳhatā muaaf ḳhatā-kār maiñ bhī huuñ

sattār tū rahīm tū rahmān tū ġhafūr

har ik qadam pe terā gunahgār maiñ bhī huuñ

dil anjuman-e-nāz meñ uljhā hai āj-kal

duniyā kī lazzatoñ meñ giraftār maiñ bhī huuñ

merī taraf bhī koī mohabbat bharī nazar

ai husn-e-yār tālib-e-dīdār maiñ bhī huuñ

koī duā ki khil uThe māyūs zindagī

koī davā ki der se bīmār maiñ bhī huuñ

bātil ke saath chalnā gavāra nahīñ 'hilāl'

haq baat gar kahūñ to sar-e-dār maiñ bhī huuñ

lutf-o-karam ka tere talabgar main bhi hun

ya-rab KHata muaf KHata-kar main bhi hun

sattar tu rahim tu rahman tu ghafur

har ek qadam pe tera gunahgar main bhi hun

dil anjuman-e-naz mein uljha hai aaj-kal

duniya ki lazzaton mein giraftar main bhi hun

meri taraf bhi koi mohabbat bhari nazar

ai husn-e-yar talib-e-didar main bhi hun

koi dua ki khil uThe mayus zindagi

koi dawa ki der se bimar main bhi hun

baatil ke sath chalna gawara nahin 'hilal'

haq baat gar kahun to sar-e-dar main bhi hun