لٹی بہار تو نظم چمن پہ کیا گزری

لٹی بہار تو نظم چمن پہ کیا گزری

نہ پوچھئے کہ گلوں کے بدن پہ کیا گزری

تمہارے شہر میں مارے گئے جسے پتھر

کسے ہے درد وہ دیوانہ پن پہ کیا گزری

نصیب ہو گیا اس کو مقام ہستی کا

نہ پوچھو مورد دار و رسن پہ کیا گزری

شکست جام کی آواز ہے گواہ اس کی

کہ میکدے میں کسی دل شکن پہ کیا گزری

ضرور علم ہے اس کا نگاہ ساقی کو

کہ تنگ ظرفی سے تشنہ دہن پہ کیا گزری

وہ ایک ناز تغافل سے اٹھ گئے لیکن

خبر نہیں کہ بھری انجمن پہ کیا گزری

وطن کا آ گیا جس دم خیال غربت میں

نظرؔ نہ پوچھو غریب الوطن پہ کیا گزری