luTi bahaar to nazm-e-chaman pe kya guzri

luTī bahār to nazm-e-chaman pe kyā guzrī

na pūchhiye ki guloñ ke badan pe kyā guzrī

tumhāre shahr meñ maare ga.e jise patthar

kise hai dard vo dīvāne-pan pe kyā guzrī

nasīb ho gayā us ko maqām hastī kā

na pūchho morid-e-dār-o-rasan pe kyā guzrī

shikast-e-jām kī āvāz hai gavāh us kī

ki mai-kade meñ kisī dil-shikan pe kyā guzrī

zarūr ilm hai is kā nigāh-e-sāqī ko

ki tang-zarfī se tishna-dahan pe kyā guzrī

vo ek nāz-e-taġhāful se uTh ga.e lekin

ḳhabar nahīñ ki bharī anjuman pe kyā guzrī

vatan kā aa gayā jis dam ḳhayāl ġhurbat meñ

'nazar' na pūchho ġharīb-ul-vatan pe kyā guzrī

luTi bahaar to nazm-e-chaman pe kya guzri

na puchhiye ki gulon ke badan pe kya guzri

tumhaare shahr mein mare gae jise patthar

kise hai dard wo diwane-pan pe kya guzri

nasib ho gaya us ko maqam hasti ka

na puchho morid-e-dar-o-rasan pe kya guzri

shikast-e-jam ki aawaz hai gawah us ki

ki mai-kade mein kisi dil-shikan pe kya guzri

zarur ilm hai is ka nigah-e-saqi ko

ki tang-zarfi se tishna-dahan pe kya guzri

wo ek naz-e-taghaful se uTh gae lekin

KHabar nahin ki bhari anjuman pe kya guzri

watan ka aa gaya jis dam KHayal ghurbat mein

'nazar' na puchho gharib-ul-watan pe kya guzri