لٹنے کا کہیں خوف کہیں مرنے کا ڈر ہے

لٹنے کا کہیں خوف کہیں مرنے کا ڈر ہے

دوزخ کا یہ آنگن ہے کہ دنیائے بشر ہے

کس وہم میں کس حال میں اقبال عمرؔ ہے

اللہ دکھائی نہیں دیتا ہے مگر ہے

آکاش پہ چمکا بھی نہیں صبح کا تارا

اور آپ یہ کہتے ہیں سحر ہے تو سحر ہے

میں اپنی طبیعت کی نزاکت سے ہوں واقف

ہنستی ہوئی بستی میں کہاں میرا گزر ہے

میں اور کدھر جاؤں کہاں وقت گزاروں

تسکین دل زار ادھر ہے نہ ادھر ہے

یوں بھی ہے کہ تعمیر میں شامل ہے مرا خوں

یہ شہر مرا شہر ہے یہ گھر مرا گھر ہے

ایسے میں تو پورب کی طرف میرؔ گئے تھے

اپنے کو سنبھالے ہوئے اقبال عمرؔ ہے