luTne ka kahin KHauf kahin marne ka Dar hai

luTne kā kahīñ ḳhauf kahīñ marne kā Dar hai

dozaḳh kā ye āñgan hai ki duniyā-e-bashar hai

kis vahm meñ kis haal meñ 'iqbāl-umar' hai

allāh dikhā.ī nahīñ detā hai magar hai

ākāsh pe chamkā bhī nahīñ sub.h kā taarā

aur aap ye kahte haiñ sahar hai to sahar hai

maiñ apnī tabī'at kī nazākat se huuñ vāqif

hañstī huī bastī meñ kahāñ merā guzar hai

maiñ aur kidhar jā.ūñ kahāñ vaqt guzārūñ

taskīn dil-e-zār idhar hai na udhar hai

yuuñ bhī hai ki tā'mīr meñ shāmil hai mirā ḳhuuñ

ye shahr mirā shahr hai ye ghar mirā ghar hai

aise meñ to pūrab kī taraf 'mīr' ga.e the

apne ko sañbhāle hue 'iqbāl-umar' hai

luTne ka kahin KHauf kahin marne ka Dar hai

dozaKH ka ye aangan hai ki duniya-e-bashar hai

kis wahm mein kis haal mein 'iqbaal-umar' hai

allah dikhai nahin deta hai magar hai

aakash pe chamka bhi nahin subh ka tara

aur aap ye kahte hain sahar hai to sahar hai

main apni tabi'at ki nazakat se hun waqif

hansti hui basti mein kahan mera guzar hai

main aur kidhar jaun kahan waqt guzarun

taskin dil-e-zar idhar hai na udhar hai

yun bhi hai ki ta'mir mein shamil hai mera KHun

ye shahr mera shahr hai ye ghar mera ghar hai

aise mein to purab ki taraf 'mir' gae the

apne ko sanbhaale hue 'iqbaal-umar' hai