luTe maze jo humne tumhaare ugal ke

luuTe maze jo ham ne tumhāre ugaal ke

mar mar ga.e raqīb lahū Daal Daal ke

be-yār dūd-o-lukkā mire āsmāñ banā

saaqī banā de maah piyāla uchhāl ke

bigḌe hue ho aaj banāvaT na kījiye

ai jaan chhupte haiñ kahīñ tevar malāl ke

pahuñchā diyā hai dam meñ lab-e-bām-e-yār tak

qaa.il haiñ ham to apnī kamand-e-ḳhayāl ke

duniyā-e-dūñ ko aañkh uThā kar na dekhiye

āshiq javān hote haiñ kab pīr-zāl ke

apne hī silsile meñ hai bai.at unheñ nasīb

zulfoñ ke sab faqīr hamāre haiñ baal ke

TūTeñ na ḳhaar aur kahīñ phūTeñ na aable

vahshat meñ paañv rakhte haiñ apnā sambhāl ke

vahshat meñ apne haath se pahuñchā hameñ gazand

pachhtā.e āstīn meñ ham saañp paal ke

ham un se aur vo ham se dam-e-sulh the ḳhajil

chhīñTe laḌā kiye araq-e-infi.āl ke

be-yār mai-kashī bhī jo kiije to ġham ke saath

jām-o-subū banā.iye gard-e-malāl ke

dil meñ tumhārī yaad bhī hai jaan lījiye

tīr-e-nigah lagā.iegā dekh-bhāl ke

dāñtoñ meñ missī mal ke agar kījiye ḳhelāl

nazroñ meñ mail surma hoñ tinke ḳhelāl ke

raftār-e-kilk qahr hai aafat sarīr-e-kilk

mazmūñ jo likh rahā huuñ tire bol-chāl ke

ham-mashraboñ meñ chal ke 'qalaq' mai-kashī karo

jhagḌe vahāñ nahīñ haiñ harām-o-halāl ke

luTe maze jo hum ne tumhaare ugal ke

mar mar gae raqib lahu Dal Dal ke

be-yar dud-o-lukka mere aasman bana

saqi bana de mah piyala uchhaal ke

bigDe hue ho aaj banawaT na kijiye

ai jaan chhupte hain kahin tewar malal ke

pahuncha diya hai dam mein lab-e-baam-e-yar tak

qail hain hum to apni kamand-e-KHayal ke

duniya-e-dun ko aankh uTha kar na dekhiye

aashiq jawan hote hain kab pir-zal ke

apne hi silsile mein hai baiat unhen nasib

zulfon ke sab faqir hamare hain baal ke

TuTen na KHar aur kahin phuTen na aable

wahshat mein panw rakhte hain apna sambhaal ke

wahshat mein apne hath se pahuncha hamein gazand

pachhtae aastin mein hum sanp pal ke

hum un se aur wo hum se dam-e-sulh the KHajil

chhinTe laDa kiye araq-e-infial ke

be-yar mai-kashi bhi jo kije to gham ke sath

jam-o-subu banaiye gard-e-malal ke

dil mein tumhaari yaad bhi hai jaan lijiye

tir-e-nigah lagaiega dekh-bhaal ke

danton mein missi mal ke agar kijiye KHelal

nazron mein mail surma hon tinke KHelal ke

raftar-e-kilk qahr hai aafat sarir-e-kilk

mazmun jo likh raha hun tere bol-chaal ke

ham-mashrabon mein chal ke 'qalaq' mai-kashi karo

jhagDe wahan nahin hain haram-o-halal ke