masiyat rah ki diwar hui jati hai

mā'siyat raah kī dīvār huī jaatī hai

ab Dagar aur bhī pur-ḳhār huī jaatī hai

vo qanā'at hai tabī'at meñ ki vaqt-e-ruḳhsat

ik nazar hāsil-e-dīdār huī jaatī hai

kaun hai naġhma-sarā aaj ki rūh-e-murda

raqs kartī hai to sarshār huī jaatī hai

'aql raqba hai ki ābād huā jaatā hai

dil 'imārat hai ki mismār huī jaatī hai

do-ruḳhe-pan pe zarā hone lagā kyā maa.il

ik hamiyyat hai ki bedār huī jaatī hai

kyā huā tujh ko mirī himmat-e-dushvār-pasand

zimmedārī bhī girāñ-bār huī jaatī hai

kaun se dar pe paTak aa.uuñ sar-e-nā-ahlāñ

ḳhud-pasandī bhī dil-āzār huī jaatī hai

kal yahī tark-e-ta'alluq pe musir thī 'sāqib'

aaj dekho yahī dil-dār huī jaatī hai

ma'siyat rah ki diwar hui jati hai

ab Dagar aur bhi pur-KHar hui jati hai

wo qana'at hai tabi'at mein ki waqt-e-ruKHsat

ek nazar hasil-e-didar hui jati hai

kaun hai naghma-sara aaj ki ruh-e-murda

raqs karti hai to sarshaar hui jati hai

'aql raqba hai ki aabaad hua jata hai

dil 'imarat hai ki mismar hui jati hai

do-ruKHe-pan pe zara hone laga kya mail

ek hamiyyat hai ki bedar hui jati hai

kya hua tujh ko meri himmat-e-dushwar-pasand

zimmedari bhi giran-bar hui jati hai

kaun se dar pe paTak aaun sar-e-na-ahlan

KHud-pasandi bhi dil-azar hui jati hai

kal yahi tark-e-ta'alluq pe musir thi 'saqib'

aaj dekho yahi dil-dar hui jati hai