مآل عاشقی ہے اپنی ہستی سے گزر جانا

مآل عاشقی ہے اپنی ہستی سے گزر جانا

کمال زندگی ہے موت سے پہلے ہی مر جانا

کلیسا سے غرض مجھ کو نہ مطلب دیر و کعبہ سے

جبیں نے میری ہر ذرے کو تیرا سنگ در جانا

زمانہ اس کی قسمت پر ہمیشہ ناز کرتا ہے

میسر ہو جسے محبوب کے کوچے میں مر جانا

وہ بزم غیر میں جانے لگے ہیں شوق سے جائیں

مگر طرفہ ستم ہے میرے کوچے سے گزر جانا

کمالؔ ان کی عیادت اک قیامت کر گئی برپا

شکن ماتھے پہ پڑنا اور مریض غم کا مر جانا