maal-e-ahl-e-zamin bar-sar-e-zamin aata

ma.āl-e-ahl-e-zamīñ bar-sar-e-zamīñ aatā

jo be-yaqīn haiñ un ko bhī phir yaqīñ aatā

kahīñ to ham bhī Thaharte jo ham-nashīnī ko

nikal ke ḳhvāb se vo yār-e-dil-nashīñ aatā

vo jab talak nahīñ aatā pukārte rahte

to dekh lete ki vo kab talak nahīñ aatā

ḳhayāl aayā to ye bhī ḳhayāl aayā hai

yahī ḳhayāl agar roz-e-avvalīñ aatā

chalo ab us kī ḳhushī vo jahāñ bhī mil jaa.e

mazā to jab thā ki milne ko vo yahīñ aatā

bas ek baat hamārī samajh meñ aatī hai

samajh meñ varna hamārī bhī kuchh nahīñ aatā

maal-e-ahl-e-zamin bar-sar-e-zamin aata

jo be-yaqin hain un ko bhi phir yaqin aata

kahin to hum bhi Thaharte jo ham-nashini ko

nikal ke KHwab se wo yar-e-dil-nashin aata

wo jab talak nahin aata pukarte rahte

to dekh lete ki wo kab talak nahin aata

KHayal aaya to ye bhi KHayal aaya hai

yahi KHayal agar roz-e-awwalin aata

chalo ab us ki KHushi wo jahan bhi mil jae

maza to jab tha ki milne ko wo yahin aata

bas ek baat hamari samajh mein aati hai

samajh mein warna hamari bhi kuchh nahin aata