mah-e-taban teri taswir banate hue the

māh-e-tābāñ tirī tasvīr banāte hue the

dil se paivast koī tiir banāte hue the

log jis dasht meñ shamshīr banāte hue the

ham vahāñ lahn-e-mazāmīr banāte hue the

aur kyā ḳhaak pe añgusht se ḳhat khīñchte the

kisht-e-dil-gīr ko kashmīr banāte hue the

khāre paanī se kiyā karte the billor kashīd

dāna-e-shor se iksīr banāte hue the

zaḳhm ham ne kabhī ālūda-e-marham na kiyā

hijr ko vasl kī ta.abīr banāte hue the

chāñd bādal se nikaltā kabhī chhuptā thā udhar

ham idhar ḳhvāb kī tasvīr banāte hue the

jism ke lothaḌe malboñ meñ udhar DhūñDte the

aur idhar ik na.ī ta.amīr banāte hue the

yuuñ koī dasht-e-suḳhan kā kahīñ hotā hai 'asad'

haañ magar ishq ko jo 'mīr' banāte hue the

mah-e-taban teri taswir banate hue the

dil se paiwast koi tir banate hue the

log jis dasht mein shamshir banate hue the

hum wahan lahn-e-mazamir banate hue the

aur kya KHak pe angusht se KHat khinchte the

kisht-e-dil-gir ko kashmir banate hue the

khaare pani se kiya karte the billor kashid

dana-e-shor se iksir banate hue the

zaKHm hum ne kabhi aaluda-e-marham na kiya

hijr ko wasl ki tabir banate hue the

chand baadal se nikalta kabhi chhupta tha udhar

hum idhar KHwab ki taswir banate hue the

jism ke lothaDe malbon mein udhar DhunDte the

aur idhar ek nai tamir banate hue the

yun koi dasht-e-suKHan ka kahin hota hai 'asad'

han magar ishq ko jo 'mir' banate hue the