mah-o-anjum kahkashan ke aashiyanon se pare

māh-o-anjum kahkashāñ ke āshiyānoñ se pare

āḳhirī manzil hai merī āsmānoñ se pare

aise aalam meñ haqīqat kā ho kaise inkishāf

vo abhī pahuñche nahīñ haiñ dāstānoñ se pare

ek tūfāñ se diloñ kī kashtiyāñ haiñ muntashir

ek tūfāñ muntazir hai bādbānoñ se pare

aap apnī ambarīñ zulfeñ havā meñ khol deñ

ḳhushbueñ to jā chukī haiñ gulistānoñ se pare

ḳhastagī se jin kī qaa.em hai mohabbat shahr meñ

kuchh makāñ aise bhī haiñ ūñche makānoñ se pare

nasl-e-ādam ke sabhī afrād haiñ is meñ sharīk

ye jahāñ ik ḳhāndāñ hai ḳhāndānoñ se pare

aao ham 'asrār' dekheñ kyā vahāñ hai ḳhaas moḌ

uTh rahī hai gard sī kuchh kārvānoñ se pare

mah-o-anjum kahkashan ke aashiyanon se pare

aaKHiri manzil hai meri aasmanon se pare

aise aalam mein haqiqat ka ho kaise inkishaf

wo abhi pahunche nahin hain dastanon se pare

ek tufan se dilon ki kashtiyan hain muntashir

ek tufan muntazir hai baadbanon se pare

aap apni ambarin zulfen hawa mein khol den

KHushbuen to ja chuki hain gulistanon se pare

KHastagi se jin ki qaem hai mohabbat shahr mein

kuchh makan aise bhi hain unche makanon se pare

nasl-e-adam ke sabhi afrad hain is mein sharik

ye jahan ek KHandan hai KHandanon se pare

aao hum 'asrar' dekhen kya wahan hai KHas moD

uTh rahi hai gard si kuchh karwanon se pare