mahaul hai ajib mere aas-pas ka

māhaul hai ajiib mire ās-pās kā

har shaḳhs hai shikār jo ḳhauf-o-hirās kā

apne vajūd kī bhī haqīqat na pā sakā

markaz huuñ dā.ere kā maiñ yā nuqta raas kā

kyā kyā ye marhale haiñ abhī mere sāmne

har dam rahā hai saath mujhe ġham kā yaas kā

vo surḳh-rū lage hai yuuñ ujle libās meñ

ik jal rahā ho jaise ki jangal kapās kā

vo kaun hai jise na ho ḳhushbū kī aarzū

har shaḳhs paas rakhtā hai ā.īna aas kā

har chand go ki maiñ to nahīñ us se mutma.in

lekin asar huā hai mire iltimās kā

aqdār-e-ilm-o-fahm kā ye daur hī nahīñ

'āzim' ye daur aaj kā hai ḳhush-libās kā

mahaul hai ajib mere aas-pas ka

har shaKHs hai shikar jo KHauf-o-hiras ka

apne wajud ki bhi haqiqat na pa saka

markaz hun daere ka main ya nuqta ras ka

kya kya ye marhale hain abhi mere samne

har dam raha hai sath mujhe gham ka yas ka

wo surKH-ru lage hai yun ujle libas mein

ek jal raha ho jaise ki jangal kapas ka

wo kaun hai jise na ho KHushbu ki aarzu

har shaKHs pas rakhta hai aaina aas ka

har chand go ki main to nahin us se mutmain

lekin asar hua hai mere iltimas ka

aqdar-e-ilm-o-fahm ka ye daur hi nahin

'azim' ye daur aaj ka hai KHush-libas ka