mail-ba-dosti wo kidhar hai kidhar nahin

mā.il-ba-dostī vo kidhar hai kidhar nahīñ

allāh jāntā hai mujhe kuchh ḳhabar nahīñ

har-chand kuchh bhī dūrī-e-qalb-o-nazar nahīñ

ik dūsre se phir bhī magar bā-ḳhabar nahīñ

har sat.h-e-rang se hai mazāq-e-nazar buland

jalva yahāñ koī bhī ba-qadr-e-nazar nahīñ

an-dekhī manziloñ kā hai is aa.ine meñ aks

ye merā dil hai sang-e-sar-e-rahguzar nahīñ

chhā jaa.e laakh chāñd sitāroñ pe aadmī

kuchh bhī nahīñ jo vus.at-e-qalb-o-nazar nahīñ

dāman ġhubār se na bachāo musāfiro

sarmāya-e-safar hai ye gard-e-safar nahīñ

sustā.e kyā 'zafar' koī rāh-e-hayāt meñ

vo dhuup hai ki chhāñv kisī moḌ par nahīñ

mail-ba-dosti wo kidhar hai kidhar nahin

allah jaanta hai mujhe kuchh KHabar nahin

har-chand kuchh bhi duri-e-qalb-o-nazar nahin

ek dusre se phir bhi magar ba-KHabar nahin

har sath-e-rang se hai mazaq-e-nazar buland

jalwa yahan koi bhi ba-qadr-e-nazar nahin

an-dekhi manzilon ka hai is aaine mein aks

ye mera dil hai sang-e-sar-e-rahguzar nahin

chha jae lakh chand sitaron pe aadmi

kuchh bhi nahin jo wusat-e-qalb-o-nazar nahin

daman ghubar se na bachao musafiro

sarmaya-e-safar hai ye gard-e-safar nahin

sustae kya 'zafar' koi rah-e-hayat mein

wo dhup hai ki chhanw kisi moD par nahin