mail-ba-karam mujh par ho jaen to achchha ho

mā.il-ba-karam mujh par ho jaa.eñ to achchhā ho

maqbūl mire sajde ho jaa.eñ to achchhā ho

is dasht-navardī se pīchhā to kahīñ chhūTe

ham kūcha-e-jānāñ meñ mar jaa.eñ to achchhā ho

sar ho dar-e-jānāñ pe dam apnā nikal jaa.e

ye kaam mohabbat meñ kar jaa.eñ to achchhā ho

yuuñ to sabhī aa.e haiñ dafnāne mujhe lekin

vo bhī mirī mayyat pe aa jaa.eñ to achchhā ho

phir dard-e-judā.ī kā jhagḌā na rahe koī

ham naam tirā le kar mar jaa.eñ to achchhā ho

dekheñ na kisī ko ham phir dekh ke ruḳh terā

dīdār tirā kar ke mar jaa.eñ to achchhā ho

rah jaa.e mohabbat kā duniyā meñ bharam kuchh to

do phuul hī turbat pe dhar jaa.eñ to achchhā ho

dhaḌkā lagā rahtā hai har vaqt balāoñ kā

ham saath nasheman ke jal jaa.eñ to achchhā ho

badnām hī karne ko aa.eñ vo magar aa.eñ

vo itnā karam mujh par kar jaa.eñ to achchhā ho

jā sakte haiñ jaane ko ham chal ke 'fanā' dekheñ

vo ḳhud hameñ mahfil meñ bulvā.eñ to achchhā ho

mail-ba-karam mujh par ho jaen to achchha ho

maqbul mere sajde ho jaen to achchha ho

is dasht-nawardi se pichha to kahin chhuTe

hum kucha-e-jaanan mein mar jaen to achchha ho

sar ho dar-e-jaanan pe dam apna nikal jae

ye kaam mohabbat mein kar jaen to achchha ho

yun to sabhi aae hain dafnane mujhe lekin

wo bhi meri mayyat pe aa jaen to achchha ho

phir dard-e-judai ka jhagDa na rahe koi

hum nam tera le kar mar jaen to achchha ho

dekhen na kisi ko hum phir dekh ke ruKH tera

didar tera kar ke mar jaen to achchha ho

rah jae mohabbat ka duniya mein bharam kuchh to

do phul hi turbat pe dhar jaen to achchha ho

dhaDka laga rahta hai har waqt balaon ka

hum sath nasheman ke jal jaen to achchha ho

badnam hi karne ko aaen wo magar aaen

wo itna karam mujh par kar jaen to achchha ho

ja sakte hain jaane ko hum chal ke 'fana' dekhen

wo KHud hamein mahfil mein bulwaen to achchha ho