mail hua jafa pe wo tark-e-wafa ke baad

maa.il huā jafā pe vo tark-e-vafā ke ba.ad

bād-e-sumūm aa.ī hai mauj-e-sabā ke ba.ad

dekhā jise baġhaur vahī sar-kashīda thā

jaise ki musht-e-ḳhāk ho sab kuchh ḳhudā ke ba.ad

chāhā ye thā kuchh aur bhī hāsil ho qurb-e-yār

vo aur khiñch gayā ye asar thā duā ke ba.ad

ab to marīz-e-ishq se māyūs hai tabīb

darmāñ hai maut hī maraz-e-lā-davā ke ba.ad

sirf is ḳhayāl se kahīñ tujh par na aa.e harf

khole na lab tire sitam-e-nā-ravā ke ba.ad

āb-o-havā-e-ḳhuld bhī shāyad na raas aa.e

ai 'soz' us ke shahr kī āb-o-havā ke ba.ad

mail hua jafa pe wo tark-e-wafa ke baad

baad-e-sumum aai hai mauj-e-saba ke baad

dekha jise baghaur wahi sar-kashida tha

jaise ki musht-e-KHak ho sab kuchh KHuda ke baad

chaha ye tha kuchh aur bhi hasil ho qurb-e-yar

wo aur khinch gaya ye asar tha dua ke baad

ab to mariz-e-ishq se mayus hai tabib

darman hai maut hi maraz-e-la-dawa ke baad

sirf is KHayal se kahin tujh par na aae harf

khole na lab tere sitam-e-na-rawa ke baad

aab-o-hawa-e-KHuld bhi shayad na ras aae

ai 'soz' us ke shahr ki aab-o-hawa ke baad