malum hi nahin ki mujhe kya bala hua

mālūm hī nahīñ ki mujhe kyā balā huā

kuchh dekhte hī tujh ko ye dil mubtalā huā

garmī-e-bazm aaj hai kuchh had setī ziyād

dīvār pīchhe koī na ho dil jalā huā

taskīñ huī use jo gayā be-qarār vaañ

kūcha tirā kahāñ huā dārushshifā huā

bose ke māñgne ke sivā aur kuchh batā

taqsīr ham ne kyā kī jo itnā ḳhafā huā

lagte hī Thes phoḌe kī mānind bah chalā

kyā kahiye aah dil na huā aabla huā

gul dil-figār o laala huā ġham se dāġhdār

jaise ki tere hāthoñ pe rang-e-hinā huā

daulat se dāġh-e-ishq ke siina mirā tamām

aa dekh misl-e-taḳhta-e-gul ḳhush-fazā huā

us kī galī meñ dekhā 'jahāñdār' ke ta.iiñ

mānind-e-naqsh-e-pā thā sar-e-rah paḌā huā

malum hi nahin ki mujhe kya bala hua

kuchh dekhte hi tujh ko ye dil mubtala hua

garmi-e-bazm aaj hai kuchh had seti ziyaad

diwar pichhe koi na ho dil jala hua

taskin hui use jo gaya be-qarar wan

kucha tera kahan hua darushshifa hua

bose ke mangne ke siwa aur kuchh bata

taqsir hum ne kya ki jo itna KHafa hua

lagte hi Thes phoDe ki manind bah chala

kya kahiye aah dil na hua aabla hua

gul dil-figar o lala hua gham se daghdar

jaise ki tere hathon pe rang-e-hina hua

daulat se dagh-e-ishq ke sina mera tamam

aa dekh misl-e-taKHta-e-gul KHush-faza hua

us ki gali mein dekha 'jahandar' ke tain

manind-e-naqsh-e-pa tha sar-e-rah paDa hua