malum nahin kaun si basti ke makin the

mā'lūm nahīñ kaun sī bastī ke makīñ the

kuchh log mirī soch se bhī baḌh ke hasīñ the

ab mujh ko vo ik pal bhī mayassar nahīñ hote

arbāb jo masnad pe yahīñ taḳht-nashīñ the

ye baat 'ajab hai ki hamārā na huā tū

kyā ham na tire 'ahd ke tābinda nagīñ the

afsos use prem kā ik lafz nahīñ yaad

qisse mirī chāhat ke jise zehn-nashīñ the

ab bhuul chuke apne ḳhad-o-ḳhāl to kyā hai

ham log kisī daur meñ had-darja zahīñ the

paḌhtā huuñ bahut shauq se purkhoñ ke fasāne

muflis the magar gaañv kī 'izzat ke amiiñ the

ma'lum nahin kaun si basti ke makin the

kuchh log meri soch se bhi baDh ke hasin the

ab mujh ko wo ek pal bhi mayassar nahin hote

arbab jo masnad pe yahin taKHt-nashin the

ye baat 'ajab hai ki hamara na hua tu

kya hum na tere 'ahd ke tabinda nagin the

afsos use prem ka ek lafz nahin yaad

qisse meri chahat ke jise zehn-nashin the

ab bhul chuke apne KHad-o-KHal to kya hai

hum log kisi daur mein had-darja zahin the

paDhta hun bahut shauq se purkhon ke fasane

muflis the magar ganw ki 'izzat ke amin the