mamul pe sahil rahta hai fitrat pe samundar hota hai

māmūl pe sāhil rahtā hai fitrat pe samundar hotā hai

tūfāñ jo Dubo de kashtī ko kashtī hī ke andar hotā hai

jo fasl-e-ḳhizāñ meñ kāñToñ par raqsān-o-ġhazal-ḳhvāñ guzre the

vo mausam-e-gul meñ bhuul ga.e phūloñ meñ bhī ḳhanjar hotā hai

har shaam charāġhāñ hotā hai ashkoñ se hamārī palkoñ par

har sub.h hamārī bastī meñ jaltā huā manzar hotā hai

ab dekh ke apnī sūrat ko ik choT sī dil par lagtī hai

guzre hue lamhe kahte haiñ ā.īna bhī patthar hotā hai

is shahr-e-sitam meñ pahle to 'manzūr' bahut se qātil the

ab qātil ḳhud hī masīhā hai ye zikr barābar hotā hai

mamul pe sahil rahta hai fitrat pe samundar hota hai

tufan jo Dubo de kashti ko kashti hi ke andar hota hai

jo fasl-e-KHizan mein kanTon par raqsan-o-ghazal-KHwan guzre the

wo mausam-e-gul mein bhul gae phulon mein bhi KHanjar hota hai

har sham charaghan hota hai ashkon se hamari palkon par

har subh hamari basti mein jalta hua manzar hota hai

ab dekh ke apni surat ko ek choT si dil par lagti hai

guzre hue lamhe kahte hain aaina bhi patthar hota hai

is shahr-e-sitam mein pahle to 'manzur' bahut se qatil the

ab qatil KHud hi masiha hai ye zikr barabar hota hai