mana hazar sal se hun dar-ba-dar raha

maanā hazār saal se huuñ dar-ba-dar rahā

lekin kisī kī chaah ke zer-e-asar rahā

jo bujh ga.e charāġh zamīñ-bos ho ga.e

maiñ jal rahā thā is liye maiñ baam par rahā

dariyā ke paar saarā qabīla utar gayā

lekin vo ek shaḳhs jise ḳhud kā Dar rahā

dīvāna-vār phirtā rahā hai jo dasht dasht

āḳhir vo kis gumān ke zer-e-asar rahā

yārān-e-ḳhush-nasīb meñ hogā mirā shumār

kuchh roz tujh se dost ta.alluq agar rahā

phir apne aap kā bhī vo rah pā.egā kahāñ

kuchh der mere saath agar ham-safar rahā

āḳhir mujhe bhī tamġha-e-rusvā.ī mil gayā

jo khel khelne kā na thā khel kar rahā

'mansūr' terā naam shahīdoñ meñ aa gayā

tā-hashr varna kaun yahāñ mo'atabar rahā

mana hazar sal se hun dar-ba-dar raha

lekin kisi ki chah ke zer-e-asar raha

jo bujh gae charagh zamin-bos ho gae

main jal raha tha is liye main baam par raha

dariya ke par sara qabila utar gaya

lekin wo ek shaKHs jise KHud ka Dar raha

diwana-war phirta raha hai jo dasht dasht

aaKHir wo kis guman ke zer-e-asar raha

yaran-e-KHush-nasib mein hoga mera shumar

kuchh roz tujh se dost talluq agar raha

phir apne aap ka bhi wo rah paega kahan

kuchh der mere sath agar ham-safar raha

aaKHir mujhe bhi tamgha-e-ruswai mil gaya

jo khel khelne ka na tha khel kar raha

'mansur' tera nam shahidon mein aa gaya

ta-hashr warna kaun yahan mo'atabar raha